شركة انفينكس أعلنت عن موبايلها الاقتصادي الجديد، الـ Infinix Hot 60 Pro، واللي جاي بمواصفات قوية جدًا بالنسبة لسعره، أهمها شاشة أموليد مسطحة خرافية بتردد 144 هرتز وحواف قليلة جدًا، مع معالج كويس من نوع Helio G200. ده غير البطارية الكبيرة 5160 مللي أمبير اللي بتدعم الشحن السريع بقوة 45 وات. يلا بينا نشوف كل تفاصيل الموبايل ومميزاته وعيوبه.
الشاشة (أقوى ميزة في الموبايل)
دي أهم وأقوى نقطة في الموبايل ده بلا منازع، انفينكس بتقدم شاشة تكسر بيها المنافسة في الفئة الاقتصادية. الشاشة بتيجي مسطحة وفيها ثقب للكاميرا، ونوعها AMOLED بمساحة كبيرة 6.78 بوصة وبجودة عالية جدًا 1.5K. المميز فيها هو ترددها السريع جدًا 144 هيرتز، وحوافها القليلة اللي بتدي شكل فخم، وسطوعها العالي اللي بيوصل لـ 1600 شمعة (فعليًا)، يعني هتشوفها بوضوح تام تحت الشمس. الشاشة كمان عليها طبقة حماية قوية من نوع Gorilla Glass 7i.
البطارية والشحن فى Infinix Hot 60 Pro
الموبايل Infinix Hot 60 Pro بييجي ببطارية كبيرة بسعة 5160 مللي أمبير، ودي هتكمل معاك اليوم كله مستريح من غير أي مشاكل. الأهم من كده إنها بتدعم الشحن السريع بقوة 45 وات، وكمان بتدعم الشحن العكسي بقوة 10 وات عشان لو حبيت تشحن بيه سماعة أو أي جهاز تاني.
المعالج والأداء
الموبايل Infinix Hot 60 Pro بيشتغل بمعالج من ميدياتك وهو Helio G200 بتكنولوجيا 6 نانو. الأداء بتاعه كويس ومناسب للاستخدام اليومي والألعاب المتوسطة ومش هيخذلك. ومع وجود 8 جيجا رام وذاكرة تخزين من نوع UFS 2.2، الموبايل هيقدم أداء سلس في المهام اليومية والتطبيقات.
الكاميرات
الكاميرات فى Infinix Hot 60 Pro هنا أداءها اقتصادي، وبتقضي الغرض في الإضاءة الكويسة:
- الكاميرا الخلفية: بدقة 50 ميجا بكسل بفتحة عدسة F/1.6، وبتعتبر مقبولة في الفئة السعرية دي.
- الكاميرا الأمامية (السيلفي): بدقة 13 ميجا بكسل بفتحة عدسة F/2.2.
- تصوير الفيديو: بيدعم تصوير فيديوهات بجودة 2K.
باقي المواصفات
- التصميم والخامات: الموبايل نحيف جدًا (6.6 ملم) وخفيف (170 جرام)، وضهره بييجي بنسختين يا إما بلاستيك أو جلد، والأهم إنه مقاوم للصدمات لحد ارتفاع 1.5 متر ومقاوم لرذاذ المياه بمعيار IP64.
- الذاكرة: بيدعم تركيب كارت ميموري في مكان منفصل جنب الشريحتين، ودي ميزة ممتازة.
- الصوت: للأسف السماعات الخارجية صوتها مونو مش ستيريو، لكن الخبر الكويس إن الموبايل فيه منفذ سماعات 3.5 ملم.
- الأمان: البصمة موجودة تحت الشاشة، وبيدعم الفتح عن طريق الوجه.
- ميزات إضافية: فيه زرار إضافي مخصص للذكاء الاصطناعي وتقدر تخصصه لأي حاجة تانية.
- نظام التشغيل: بييجي بأندرويد 15 مع واجهة انفينكس XOS 15.1.
- الألوان: متوفر بألوان كتير زي الفضي والأسود والبينك والأزرق والأخضر والبرتقالي.
المميزات
- شاشة أموليد خرافية بتردد 144 هيرتز، حواف قليلة، سطوع عالي، ودقة 1.5K، ودي أفضل شاشة في الفئة دي.
- تصميم نحيف جدًا وخفيف و مقاوم للصدمات.
- بطارية كبيرة 5160 مللي أمبير مع شحن سريع 45 وات.
- معالج Helio G200 بيقدم أداء كويس ومناسب للسعر.
- بصمة تحت الشاشة سريعة وموثوقة.
- بيدعم تركيب شريحتين وكارت ميموري في نفس الوقت.
- فيه مدخل سماعات 3.5 ملم.
العيوب
- صوت السماعات الخارجية مونو مش ستريو.
- تجربة الكاميرا الخلفية متواضعة ومش أفضل حاجة.
- يعتبر نسخة من أخوه الـ Hot 60 Pro+ مع اختلافات بسيطة.
محتويات العلبة
- هاتف Infinix Hot 60 Pro وعليه اسكرينة.
- راس الشاحن بقوة 45 واط.
- سلك USB من نوع Type C.
- جراب حماية.
- دبوس معدني.
- كتيب التعليمات.
مراجعة سريعة للموبايل
من الآخر، موبايل Infinix Hot 60 Pro هو موبايل واضح وصريح جدًا. انفينكس ضحت بشوية حاجات زي الكاميرات والصوت الاستريو، عشان تديك أهم وأقوى ميزة ممكن تحتاجها في الفئة دي وهي الشاشة. لو أنت كل اللي يهمك في الموبايل إن شاشته تكون خرافية بكل معنى الكلمة، عشان تتفرج على فيديوهات وتلعب وتتصفح بأحسن جودة ممكنة، فالموبايل ده هو اختيارك الأول بلا منازع. ومع الشاشة دي هتاخد بطارية كبيرة وشحن سريع وتصميم شيك ومقاوم للصدمات، ودي تعتبر خلطة ممتازة جدًا مقابل السعر.
السعر
- في مصر (ضمان محلي):
- نسخة 256 جيجا مع 8 جيجا رام بسعر حوالي 8,700 جنيه.
