سامسونج نزلت موبايلها الجديد القابل للطي، الـ Samsung Galaxy Z Fold 7، وده بيكمل مسيرة التطوير اللي الشركة ماشية فيها. الموبايل اتطور جامد أوي، خصوصًا في التصميم اللي بقى أخف وأرفع، مع شاشات أحسن بكتير، بالذات الشاشة الخارجية اللي بقت أكبر وأعرض بمقاس 6.5 بوصة. سامسونج حطت فيه كاميرا خلفية أساسية جديدة 200 ميجا بكسل ومعالج جبار من نوع SD 8 Elite عشان تاخد أداء ممتاز. يلا بينا نعرف كل مواصفات الـ Samsung Galaxy Z Fold 7 ومميزاته وعيوبه وهل يستاهل تشتريه ولا لأ.
الشاشات فى Samsung Galaxy Z Fold 7
الموبايل ده بييجي بشاشتين عشان يديك تجربة مختلفة تمامًا:
- الشاشة الداخلية (الكبيرة): لما تفتح الموبايل، هتلاقي شاشة عملاقة من نوع Foldable Dynamic LTPO AMOLED 2X بمساحة 8 بوصة ودقة 1968×2184 بكسل. الشاشة دي فيها ثقب صغير للكاميرا، وكثافة بكسلاتها 368 بكسل لكل بوصة. أحلى حاجة فيها إن معدل تحديثها متغير من 1 لحد 120 هيرتز عشان توفر في البطارية وتديك سلاسة في نفس الوقت، وكمان بتدعم HDR10+ بسطوع بيوصل لـ 2600 شمعة.
- الشاشة الخارجية : ودي اللي بتستخدمها والموبايل مقفول، نوعها Dynamic LTPO AMOLED 2X بمساحة 6.5 بوصة ودقة 1080×2520 بكسل. هي كمان بتدعم معدل تحديث متغير من 1 لـ 120 هيرتز و HDR10+ بسطوع 2600 شمعة، وعليها طبقة حماية Gorilla Glass Victus 2 عشان الخرابيش.
الكاميرات فى Samsung Galaxy Z Fold 7
سامسونج ركزت أوي في الكاميرات السنة دي:
- الكاميرات الأمامية (السيلفي): فيه كاميرتين سيلفي، واحدة في الشاشة الداخلية بدقة 10 ميجا بكسل بفتحة عدسة F/2.2، والتانية زيها بالظبط في الشاشة الخارجية بنفس الدقة وفتحة العدسة.
- الكاميرات الخلفية: ودول 3 كاميرات بارزين عن ضهر الموبايل. الأساسية فيهم بتيجي بدقة 200 ميجا بكسل بفتحة عدسة F/1.7 وبتدعم المثبت البصري (OIS). الكاميرا التانية للزوم (التقريب) بدقة 10 ميجا بكسل بفتحة عدسة F/2.4، وبتدعم تقريب بصري لحد 3 مرات من غير ما الجودة تقل وفيها مثبت بصري. الكاميرا التالتة بدقة 12 ميجا بكسل بفتحة عدسة F/2.2 ودي بتاعة التصوير الواسع (Ultra Wide) والماكرو.
- تصوير الفيديو: الموبايل بيصور فيديوهات بجودة 8K بمعدل 30 فريم في الثانية، و 4K بمعدل 30 و 60 فريم في الثانية.
المعالج والأداء
أما الأداء، فالموبايل ده وحش كاسر. بييجي بمعالج من شركة كوالكم من نوع Snapdragon 8 Elite بتكنولوجيا 3 نانو، مع معالج رسومي Adreno 830. التركيبة دي بتضمنلك أداء خرافي في كل حاجة، من أول الألعاب التقيلة لحد المونتاج وفتح تطبيقات كتير في نفس الوقت.
مواصفات Samsung Galaxy Z Fold 7
- الرامات والمساحة: الموبايل ليه 3 إصدارات: الأول 256 جيجا مع 12 جيجا رام، التاني 512 جيجا مع 12 جيجا رام، والتالت 1 تيرا بايت مع 16 جيجا رام. وطبعًا مش بيدعم تركيب كارت ميموري.
- الخامات والتصميم: ضهر الموبايل من الإزاز المحمي بـ Gorilla Glass Victus 2، مع فريم ألومنيوم مقاوم للخدش. وزنه 215 جرام ويعتبر خفيف بالنسبة للفئة دي.
- مقاومة المياه: الموبايل مقاوم للمياه بشهادة IP48، يعني يستحمل تحت عمق متر ونص لمدة 30 دقيقة.
- البطارية والشحن: البطارية حجمها 4400 مللي أمبير. بتدعم الشحن السريع بقوة 25 وات، والشحن اللاسلكي 15 وات، والشحن اللاسلكي العكسي بقوة 4.5 وات.
- الشبكات والشرائح: بيدعم لحد الجيل الخامس 5G، وتقدر تركب فيه شريحتين Nano SIM أو شريحة عادية والتانية eSIM.
- الصوت: السماعات الخارجية صوتها ستيريو عشان تديك تجربة صوتية مجسمة ومميزة.
- الأمان: مستشعر البصمة مدمج في زرار الباور، وكمان بيدعم فتح الموبايل بالوش (Face Unlock).
- الاتصال: فيه واي فاي 7، بلوتوث 5.4، و NFC. ومنفذ الشحن من نوع Type-C 3.2.
- نظام التشغيل: بييجي بأحدث أندرويد 16 مع واجهة سامسونج الجديدة One UI 8.
- الألوان: متوفر باللون الأسود والأزرق والرمادي.
المميزات اللى هتبهرك
- أحسن تصميم لموبايل فولد من سامسونج لحد دلوقتي، وزنه خفيف وسمكه ممتاز وهو مقفول أو مفتوح.
- شاشة خارجية بقت أكبر وأعرض، وتقدر تستخدمها في كل حاجة بسهولة وبأبعاد مريحة.
- الشاشة الداخلية العملاقة بتدي تجربة مشاهدة ممتازة من ناحية الألوان والتفاصيل والسطوع.
- أداء خرافي بفضل معالج كوالكم الرائد Snapdragon 8 Elite مع نظام تبريد ممتاز.
- كاميرا خلفية 200 ميجا بكسل بتطلع صور بجودة عالية جدًا.
- بييجي بأحدث نظام أندرويد 16 مع دعم تحديثات لمدة 7 سنين.
- بيدعم كل مميزات الذكاء الاصطناعي بتاعة سامسونج واللي شغالة عليه بكفاءة.
العيوب اللى ممكن مش هتعجبك
- سعره غالي نار كالعادة.
- مش بيدعم القلم الـ S Pen، ومش مفهوم ليه!
- كنا نتمنى البطارية تكون أكبر من كده.
- سرعة الشحن 25 وات بس، وكمان الشاحن مش بييجي في العلبة.
- الكاميرا الخلفية بارزة زيادة عن اللزوم.
- كاميرا السيلفي اللي في الشاشة الداخلية بقت ظاهرة (ثقب) مش مخفية تحت الشاشة زي الجيل اللي فات.
مراجعة سريعة للموبايل
من الآخر، الـ Z Fold 7 هو أحسن موبايل فولد من سامسونج لحد دلوقتي. تصميمه بقى أخف وأشيك، وشاشته الخارجية بقت عملية أكتر بكتير. الكاميرا الـ 200 ميجا بكسل والمعالج الجبار بيقدموا تجربة فلاج شيب حقيقية. بس خلي بالك، سعره في حتة تانية خالص، ومفيهوش مكان للقلم، والبطارية والشحن كانوا محتاجين تطوير عشان يواكبوا المنافسين. لو الفلوس مش فارقة معاك وعايز تكنولوجيا المستقبل في إيدك، فده موبايلك.
محتويات العلبة
- هاتف Samsung Galaxy Z Fold 7.
- سلك USB من نوع Type C.
- دبوس معدني.
- كتيب التعليمات.
السعر
- في مصر: نسخة 256 جيجا مع 12 جيجا رام بسعر 85,000 جنيه .. ونسخة 512 جيجا مع 12 جيجا رام بسعر 95,000 جنيه.
- في السعودية: نسخة 512 جيجا مع 12 جيجا رام بسعر 7,700 ريال .. ونسخة 1 تيرا مع 16 جيجا رام بسعر 8,800 ريال.
- في الإمارات: نسخة 512 جيجا مع 12 جيجا رام بسعر 7,600 درهم .. ونسخة 1 تيرا مع 16 جيجا رام بسعر 8,700 درهم.
