أوبو أعلنت عن وحش جديد في فئة “الفلاج شيب كيلر”، وهو الـ Oppo Reno 14 Pro. الموبايل ده جاي ينافس بمواصفات قوية جدًا، أهمها معالج جديد من ميدياتك وهو Dimensity 8450، ونظام كاميرات احترافي فيه 3 عدسات كلهم بدقة 50 ميجا بكسل. ده غير الشاشة الكبيرة المسطحة اللي حجمها 6.83 بوصة، والبطارية العملاقة اللي سعتها 6200 مللي أمبير وبتدعم الشحن السريع السلكي بقوة 80 واط واللاسلكي بقوة 50 واط. يلا بينا نشوف كل تفاصيل الموبايل ده ومميزاته وعيوبه.
الكاميرات (نظام احترافي متكامل)
أوبو السنة دي بتقدم نظام كاميرات مرعب في الموبايل ده، كل العدسات فيه قوية:
- الكاميرا الخلفية: ثلاثية، وكل عدسة فيهم ليها دور مهم وبدقة 50 ميجا بكسل.
- الأساسية: بدقة 50 ميجا بكسل بفتحة عدسة F/1.8 ومستشعر OV50E، وبتدعم المثبت البصري (OIS).
- التيلي فوتو (للزووم والبورتريه): بدقة 50 ميجا بكسل بفتحة عدسة F/2.8 ومستشعر Samsung JN5، وبتدعم المثبت البصري (OIS). بتديك تقريب بصري حقيقي 3.5X وبيوصل ديجيتال لحد 120X.
- الزاوية الواسعة (Ultra Wide): بدقة 50 ميجا بكسل بفتحة عدسة F/2.0 ومستشعر OV50D.
- الكاميرا الأمامية (السيلفي): بتيجي بدقة عملاقة 50 ميجا بكسل بمستشعر من سامسونج عشان تضمنلك صور سيلفي احترافية.
- تصوير الفيديو: الموبايل بيدعم تصوير فيديوهات بجودة 4K بمعدل 30 و 60 فريم في الثانية، وبيدعم تقنية الـ Dolby Vision.
البطارية والشحن فى Oppo Reno 14 Pro
دي واحدة من أقوى نقاط القوة في الموبايل Oppo Reno 14 Pro . بييجي ببطارية عملاقة بسعة 6200 مللي أمبير، ودي هتكمل معاك اليوم كله وأكتر من غير أي قلق. الأهم من كده إنها بتدعم كل أنواع الشحن السريع: شحن سلكي صاروخي بقوة 80 وات، و شحن لاسلكي سريع بقوة 50 وات ، وشحن عكسي عشان تشحن بيه أجهزة تانية.
المعالج والأداء الجبار
الموبايل Oppo Reno 14 Pro بيشتغل بمعالج قوي وجديد من شركة ميدياتك وهو Dimensity 8450 بتكنولوجيا 4 نانو. المعالج ده بيقدم أداء ممتاز ومستقر في كل المهام، سواء في الاستخدام اليومي أو في الألعاب التقيلة. ومع وجود 12 جيجا رام وذاكرة تخزين سريعة من نوع UFS 3.1، فانت ضامن تجربة سلسة وسريعة في كل الأوقات.
الشاشة فى Oppo Reno 14 Pro
شاشة الموبايل Oppo Reno 14 Pro بتيجي مسطحة وده بيفضله ناس كتير، وحجمها كبير جدًا 6.83 بوصة بدقة عالية (1272×2800 بكسل)، وده بيخلي تجربة المشاهدة عليها ممتعة. نوع الشاشة AMOLED وبتدعم معدل تحديث 120Hz وتقنية HDR10+، وسطوعها بيوصل لـ 1200 شمعة.
باقي المواصفات
- التصميم والخامات: الموبايل بييجي بخامات فخمة جدًا، ضهر من الإزاز مع فريم من الألومنيوم، والأهم إنه مقاوم للمياه والغبار بأعلى معيار IP68/IP69.
- الذاكرة: بييجي بنسختين 256 جيجا أو 512 جيجا، والاتنين معاهم 12 جيجا رام، وللأسف مش بيدعم تركيب كارت ميموري.
- الصوت: السماعات الخارجية صوتها ستيريو وممتاز، والموبايل فيه 3 ميكروفونات عشان جودة الصوت في المكالمات والفيديوهات تكون نقية جدًا.
- الاتصال: بيدعم شريحتين (واحدة عادية والتانية eSIM)، وفيه NFC و IR Blaster.
- الأمان: مستشعر البصمة مدمج تحت الشاشة.
- نظام التشغيل: بييجي بأندرويد 15 مع واجهة أوبو ColorOS 15.
- الألوان: متوفر باللون الرمادي (تيتانيوم) والأبيض.
المميزات
- نظام كاميرات احترافي ومتكامل (3 عدسات 50 ميجا بكسل)، هيضمنلك صور ممتازة في كل الظروف.
- بطارية عملاقة 6200 مللي أمبير هتدوم معاك وقت طويل جدًا.
- بيدعم الشحن السريع السلكي (80 وات) واللاسلكي (50 وات).
- خامات تصميم فخمة جدًا ومقاومة للمياه والغبار بأعلى معيار.
- شاشة أموليد كبيرة ومسطحة بدقة ممتازة وحواف قليلة.
- أداء قوي بفضل معالج Dimensity 8450.
العيوب
- المعالج كويس، لكن فيه منافسين بيقدموا معالجات أقوى في فئة الفلاج شيب كيلر.
- سطوع الشاشة تحت الشمس كويس، لكن مش الأعلى في فئته.
- مش بيدعم تركيب كارت ميموري.
- مفيهوش منفذ 3.5 ملم بتاع سماعات الأذن.
محتويات العلبة
- هاتف Oppo Reno 14 Pro.
- اسكرينة متركبة على الشاشة.
- راس الشاحن بقوة 80 وات.
- سلك USB من نوع Type C.
- جراب لحماية الضهر.
- دبوس معدني.
- كتيب التعليمات والضمان.
مراجعة سريعة للموبايل
من الآخر، موبايل Oppo Reno 14 Pro هو موبايل شبه متكامل وموجه للناس اللي عايزة جهاز “فلاج شيب كيلر” بيقدم كل حاجة. أوبو السنة دي بتركز على تقديم تجربة كاميرات احترافية بكل معنى الكلمة، مع بطارية هي الأضخم في فئتها وبتدعم كل أنواع الشحن السريع. ده بالإضافة لشاشة كبيرة وممتازة وخامات تصنيع فخمة. النقطة الوحيدة اللي ممكن تخليك تفكر هي إن المعالج بتاعه قوي، لكن مش الأقوى في المنافسة. لو أنت بيهمك الكاميرات والبطارية والشحن السريع قبل أي حاجة تانية، فالموبايل ده هيكون اختيار مثالي ليك.
السعر
- في مصر: للنسخة 512 جيجا مع 12 جيجا رام السعر الرسمي حوالي 37,000 جنيه، وممكن تلاقيه في المحلات بسعر يبدأ من 36,000 جنيه (ضمان محلي).
- في الإمارات: للنسخة 512 جيجا مع 12 جيجا رام بسعر حوالي 2,600 درهم.
