هواوي بتنافس بـ FreeBuds 7i في مصر بسعر مفاجأة | هل أقوى سماعة فئة متوسطة؟ -

أعلنت شركة هواوي عن سماعاتها الجديدة الـ HUAWEI FreeBuds 7i، ودي سماعة نازلة عشان تعمل قلق كبير في الفئة المتوسطة. السماعة جاية بتصميم ناعم وشيك شبه “الزلطة” كده، وعلبتها مط (Matte) عشان متتبصمش، وحجمها صغير وسهل تاخدها في أي حتة. السماعة نازلة بـ 3 ألوان (وردي، أبيض، وأسود).

لكن سيبك من الشكل، السماعة دي بتقدم قيمة مرعبة مقابل سعرها. هواوي حطت فيها مميزات “برو” غالية زي عزل الضوضاء من الفئة الأولى، وصوت مجسم (Spatial Audio) مستقل عن الموبايل، ودعم لصوتيات عالية الدقة (LDAC).

عزل الضوضاء الذكي (تجربة الهدوء) فى FreeBuds 7i

دي أول ميزة قوية، هواوي جابت أحدث نظام عزل ضوضاء عندها (ANC 4.0) وحطته في السماعة دي.

تجربة الاستخدام فى FreeBuds 7i : الأرقام بتقول إن عزل الضوضاء بقى أحسن بنسبة 30% في الترددات اللي الودن البشرية حساسة ليها. ترجمة الكلام ده إيه؟ ده معناه إن السماعة دي هتبقى ممتازة في عزل “الأصوات البشرية” اللي حواليك، زي دوشة المكاتب أو الكلام في المواصلات أو الكافيهات، مش بس صوت التكييف أو الموتور.
رأيي في الميزة دي: وصول عزل الضوضاء للمستوى ده في سماعة بسعر 4000 جنيه ده إنجاز. دي ميزة كانت حكر على السماعات الغالية. ومعاها 4 مقاسات لوسائد الأذن (الجلد) عشان تضمن إنها تقفل على ودنك صح وتاخد أحسن تجربة عزل وراحة.

جودة الصوت (تجربة الصوت النقي)

تجربة الاستخدام فى FreeBuds 7i : السماعة بتيجي بدرايفر (وحدة تشغيل) 11 مم بأربع مغناطيسات. ده معناه إن الصوت هيكون واضح، والـ Bass بتاعه عميق ومظبوط. الأهم من كل ده هو دعم السماعة لترميز LDAC (صوت عالي الدقة Hi-Res).
رأيي في الميزة دي: دعم LDAC ده نقلة كبيرة. لو أنت مشترك في خدمات زي “تايدال” أو “آبل ميوزيك” وبتسمع بجودة عالية (Lossless) من موبايل أندرويد بيدعم الميزة دي، السماعة دي هتخليك تسمع تفاصيل في الأغاني مكنتش بتسمعها قبل كده. ده غير إن فيها نظام “معادلة صوت تكيفي” (Adaptive EQ) بيستخدم ميكروفونات داخلية عشان يقيس شكل ودنك ويظبط الصوت عليها مخصوص، عشان يضمن إنك واخد أحسن جودة صوت ممكنة.

الصوت المجسم المستقل (تجربة سينمائية في أي مكان)

دي أخطر وأهم ميزة في السماعة دي، وركز أوي في كلمة “مستقل”.

تجربة الاستخدام: خاصية الصوت المجسم (Spatial Audio) اللي بتحسسك إن الصوت حواليك 360 درجة، كانت دايمًا محتاجة إن الموبايل نفسه يكون بيدعمها (زي الآيفون أو موبايلات سامسونج الغالية).
رأيي في الميزة دي: هواوي هنا عملت حركة ذكية جدًا، حطت شريحة معالجة الصوت المجسم جوه السماعة نفسها! ده معناه إنك مش محتاج موبايل معين، هتقدر تستمتع بالصوت المجسم ده على أي موبايل، أي لاب توب، أو حتى تابلت. السماعة فيها مستشعرات بتتبع حركة راسك عشان تظبط اتجاه الصوت. دي ميزة “برو” بامتياز، وكونها موجودة في سماعة بالسعر ده ده شيء خرافي.

جودة المكالمات (تجربة صوتك الواضح)

هواوي دايمًا مميزة في المكالمات، والسماعة دي بتكمل المسيرة.

تجربة الاستخدام فى FreeBuds 7i : السماعة مش بتعتمد على الميكروفونات العادية بس، لأ دي بتستخدم ميكروفون “توصيل العظم” (Bone Conduction). ده ميكروفون بيلقط صوتك من اهتزازات الفك بتاعك!
رأيي في الميزة دي: الميكروفون ده مش هزار. ده معناه إنك لو بتتكلم في مكان زحمة جدًا أو في هوا شديد (زي عندنا في إسكندرية على الكورنيش)، الميكروفون ده هيركز على صوتك أنت بس وهيعزل الدوشة اللي حواليك. صوتك هيوصل للطرف التاني واضح ونقي كأنك قاعد في أوضة مقفولة.
ميزة إضافية فى FreeBuds 7i : السماعة بتدعم إيماءات الرأس، يعني تقدر تهز راسك عشان ترفض المكالمة، أو توطّي براسك عشان تقبلها، ودي ميزة عملية جدًا لو إيدك مش فاضية.