انفنكس نزلت وحش جديد في الفئة المتوسطة موجه للجيمرز بشكل خاص، وهو الـ Infinix GT 30 Pro. الموبايل ده جاي ينافس بمعالج ألعاب قوي جدًا من نوع Dimensity 8350 Ultimate، مع شاشة أموليد ضخمة 6.78 بوصة وسريعة بتردد 144 هرتز. ده غير الكاميرا الخلفية الـ 108 ميجا بكسل، وبطارية 5500 مللي أمبير بتدعم الشحن السريع العادي واللاسلكي كمان. تعالوا ناخد لفة سريعة نعرف فيها كل مواصفات الموبايل ده ومميزاته وعيوبه عشان تعرف إذا كان يستاهل تشتريه ولا لأ.
الشاشة فى Infinix GT 30 Pro
شاشة الموبايل فى Infinix GT 30 Pro ده هي واحدة من أقوى مميزاته، بتيجي مسطحة وفيها ثقب صغير في النص للكاميرا. نوعها AMOLED ومساحتها كبيرة 6.78 بوصة بجودة 1.5K ودقة عالية 1224×2720 بكسل. الأهم من كل ده هو معدل التحديث الخرافي اللي بيوصل لـ 144Hz، وده بيخلي تجربة اللعب والتصفح سلسة لأبعد الحدود. الشاشة عليها طبقة حماية Corning Gorilla Glass 7i وسطوعها بيوصل لـ 4500 شمعة (الفعلي حوالي 1900 شمعة)، يعني هتشوفها بوضوح تام حتى تحت أشعة الشمس المباشرة.
الكاميرا فى Infinix GT 30 Pro
بالنسبة للكاميرات، فالأرقام هنا كويسة:
- الكاميرا الأمامية (السيلفي): بتيجي بدقة 13 ميجا بكسل بفتحة عدسة F/2.2.
- الكاميرا الخلفية: مزدوجة، الأساسية فيهم بتيجي بدقة 108 ميجا بكسل بفتحة عدسة F/1.9. أما الكاميرا التانية فهي بدقة 8 ميجا بكسل بفتحة عدسة F/2.2 ودي بتاعة التصوير الواسع (Ultra Wide).
- تصوير الفيديو: الموبايل بيدعم تصوير فيديوهات بجودة الـ 4K بمعدل 30 و 60 فريم في الثانية.
المعالج والأداء
هنا بقى نقطة قوة الموبايل الأساسية. بييجي بمعالج مخصص للألعاب من ميدياتك وهو Dimensity 8350 Ultimate بتكنولوجيا 4 نانو، مع معالج رسومي Mali G615-MC6. المعالج ده بيقدم أداء جبار في تشغيل الألعاب على أعلى إعدادات. انفنكس كمان استخدمت رامات سريعة جدًا من نوع LPDDR5X وذاكرة تخزين من أحدث نوع UFS 4.0 عشان تضمنلك سرعة في فتح التطبيقات والألعاب ونقل الملفات.
باقي المواصفات
- لمسات الجيمرز: ضهر الموبايل فيه إضاءة RGB تقدر تخصصها وتستخدمها لمبة إشعارات، والفريم فيه زراير تاتش (Gaming Triggers) بتساعدك في اللعب.
- الرامات والمساحة: الموبايل ليه 3 إصدارات بتبدأ من 256 جيجا مع 8 جيجا رام، وتوصل لحد 512 جيجا مع 12 جيجا رام، وللأسف مش بيدعم تركيب كارت ميموري.
- البطارية والشحن: بطارية عملاقة بسعة 5500 مللي أمبير، والأجمد إنها بتدعم شحن سريع سلكي 45 وات، وشحن لاسلكي 30 وات، وشحن عكسي سلكي ولاسلكي كمان.
- الخامات والتصميم: الموبايل مصنوع من البلاستيك ومقاوم للغبار وقطرات المياه الخفيفة بشهادة IP64. وزنه 189 جرام.
- الصوت: السماعات الخارجية صوتها ستيريو عشان تاخد تجربة صوتية مجسمة ومميزة.
- الاتصال: بيدعم شريحتين 5G، وفيه NFC و IR Blaster عشان تستخدمه كريموت كنترول.
- الأمان: مستشعر البصمة مدمج تحت الشاشة، وكمان بيدعم فتح الموبايل بالوش.
- نظام التشغيل: بييجي بأندرويد 15 مع واجهة انفنكس XOS 15.
- الألوان: متوفر باللون الفضي والأسود والرمادي.
المميزات فى Infinix GT 30 Pro
- معالج Dimensity 8350 Ultimate بيقدم أداء طلقة في الألعاب.
- شاشة أموليد كبيرة وسريعة جدًا (144Hz) بسطوع ممتاز.
- إضافات الجيمنج زي إضاءة الـ RGB والتريجرز بتدي تجربة لعب أحسن.
- بطارية ضخمة بتدعم كل أنواع الشحن السريع (سلكي، لاسلكي، وعكسي).
- صوت السماعات الاستيريو عالي ونقي.
- ذاكرة تخزين ورامات من أسرع الأنواع الموجودة حاليًا.
العيوب
- الكاميرات أداءها يعتبر متواضع مقارنة بباقي المواصفات، ومفيش مثبت بصري.
- مفيهوش منفذ الـ 3.5 ملم بتاع سماعات الأذن.
- حرارة الموبايل بترتفع شوية مع اللعب المكثف لفترات طويلة.
- مقاومة المياه والغبار مش الأفضل (IP64 فقط).
- مش بيدعم الشريحة المدمجة (eSim).
محتويات العلبة
- هاتف Infinix GT 30 Pro وعليه اسكرينة.
- راس الشاحن بقوة 45 وات.
- سلك USB من نوع Type C.
- جراب حماية.
- دبوس معدني.
- كتيب التعليمات.
مراجعة سريعة للموبايل
من الآخر، موبايل Infinix GT 30 Pro ده معمول مخصوص للشباب اللي بتحب الألعاب في الفئة المتوسطة. هيقدملك أداء خرافي بالمعالج القوي، وشاشة صاروخية 144 هرتز، وتريجرز مخصوصة للألعاب. بطاريته كمان ممتازة وفيها كل أنواع الشحن اللي ممكن تحتاجها. بس في المقابل، لازم تبقى عارف إن الكاميرات مش نقطة قوته الأساسية. لو الألعاب والسرعة والأداء هما أولويتك، فالموبايل ده يعتبر صفقة ممتازة بالسعر ده.
السعر
في مصر: نسخة 512 جيجا مع 12 جيجا رام بسعر حوالي 18,700 جنيه (ضمان محلي).
في السعودية: نسخة 512 جيجا مع 12 جيجا رام بسعر حوالي 1,350 ريال.
في الإمارات: نسخة 512 جيجا مع 12 جيجا رام بسعر حوالي 1,250 درهم.
