شركة أبل أعلنت عن موبايلها الجديد الـ iPhone 17 Pro، واللي جاي عشان يجمع بين الأداء الخرافي والحجم المثالي في الإيد. السنة دي أبل رجعت لهيكل الألومنيوم مع تصميم جديد تمامًا للكاميرا، ومعالج أقوى A19 Pro مع غرفة تبريد جديدة عشان يفضل بارد. ده غير كاميرا “تيلي فوتو” للزووم متطورة بدقة 48 ميجا بكسل، وكاميرا سيلفي جديدة 18 ميجا بكسل، مع بطارية أقوى وشاشة بحجم 6.3 بوصة سطوعها أعلى. يلا بينا نشوف كل تفاصيل الموبايل ده.
الكاميرات (تطوير كبير وقدرات زووم أعلى)
أبل بتقدم نظام كاميرات احترافي متكامل في النسخة الـ iPhone 17 Pro :
- الكاميرا الخلفية: ثلاثية، وكل عدسة فيهم بقت أقوى.
- الأساسية: بدقة 48 ميجا بكسل بفتحة عدسة F/1.6 ومثبت بصري (OIS).
- التيلي فوتو (للزووم والبورتريه): خدت تحديث ضخم وبقت بدقة 48 ميجا بكسل بفتحة عدسة F/2.8 ومثبت بصري. بتديك تقريب بصري حقيقي 4X و 8X وبيوصل ديجيتال لحد 40X.
- الزاوية الواسعة (Ultra Wide): هي كمان بقت بدقة 48 ميجا بكسل بفتحة عدسة F/2.2.
- الكاميرا الأمامية (السيلفي): اتغيرت وبقت بدقة 18 ميجا بكسل بفتحة عدسة F/1.9، ومستشعر مربع عشان تاخد صور سيلفي أوسع وأفضل.
- تصوير الفيديو: وصل لمستوى تاني، وبيدعم جودة 4K بمعدل إطارات عالي جدًا بيوصل لـ 120 إطار في الثانية، والموبايل فيه 4 ميكروفونات عشان ميزة Audio Mix اللي بتخليك تتحكم في الصوت بشكل احترافي.
- أزرار التحكم: فيه زرار Action Button اللي تقدر تخصصه، وزرار جديد اسمه Camera Control عشان تتحكم في الكاميرا كأنك ماسك كاميرا احترافية.
المعالج والأداء (قوة مع تبريد جديد)
الموبايل iPhone 17 Pro بيشتغل بأقوى معالج من أبل وهو A19 Pro بتكنولوجيا 3 نانو، مع معالج رسومي سداسي النواة. أبل أضافت السنة دي غرفة تبريد جديدة عشان تضمن إن الموبايل ميخنسش أبدًا حتى مع أتقل الألعاب والتطبيقات. ومع وجود 12 جيجا رام، الأداء هنا خرافي ومفيهوش أي تنازلات.
الشاشة
شاشة الموبايل iPhone 17 Pro بتيجي بحجم مثالي 6.3 بوصة، ونوعها LTPO Super Retina XDR OLED بدقة عالية جدًا. أهم حاجة فيها إنها بتدعم معدل تحديث متغير من 1 لحد 120 هيرتز (ProMotion)، وده بيخلي الحركة عليها سلسة وناعمة جدًا. سطوع الشاشة خرافي وبيوصل لـ 3000 شمعة، وعليها طبقة حماية جديدة أقوى من نوع Ceramic Shield 2 وطبقة مقاومة للانعكاسات.
البطارية والشحن
البطارية فى iPhone 17 Pro كبرت وبقت بسعة 3988 مللي أمبير (أو 4252 لإصدار الـ eSIM)، وبتدعم:
- شحن سريع سلكي بقوة 40 وات.
- شحن لاسلكي MagSafe و Qi2 بقوة 25 وات.
- شحن عكسي بقوة 4.5 وات.
باقي المواصفات
- التصميم والخامات: تصميم جديد بضهر من الإزاز مع فريم من الألومنيوم المصقول، والموبايل مقاوم للمياه والغبار بأعلى معيار IP68.
- الصوت: السماعات الخارجية صوتها ستيريو وممتاز كعادة أبل.
- الأمان: بصمة الوجه الـ Face ID.
- نظام التشغيل: بييجي بأحدث نظام تشغيل iOS 26.
- منفذ الشحن: من نوع Type C 3.2 Gen 2 السريع في نقل البيانات.
- الألوان: متوفر باللون السيلفر، الأزرق الغامق، والبرتقالي.
المميزات
- تصميم جديد بقطعة واحدة من الألومنيوم وشكل كاميرا خلفية مختلف لأول مرة من سنين.
- أقوى أداء ممكن بفضل معالج A19 Pro مع غرفة تبريد جديدة عشان الحرارة.
- الكاميرات بتقدم تجربة هي الأفضل، خصوصًا في الفيديو، وقدرات زووم أعلى بكتير بفضل العدسة الجديدة.
- كاميرا سيلفي جديدة وممتازة بتصور صور واسعة.
- شاشة خرافية بسطوع عالي وتردد 120 هيرتز وحجم مثالي.
- سماعات ستيريو صوتها فريد ومميز.
العيوب
- سرعات الشحن لسه تعتبر بطيئة مقارنة بالمنافسين.
- كالعادة، هتحتاج تشتري الشاحن والجراب لوحدهم.
محتويات العلبة
- هاتف Apple iPhone 17 Pro.
- دبوس معدني للشريحة.
- كتيب التعليمات.
- سلك USB من نوع Type C.
مراجعة سريعة للموبايل
من الآخر، موبايل iPhone 17 Pro السنة دي بيقدم الخلطة المثالية للي عايز موبايل فلاج شيب قوي بس في حجم معقول ومريح في الإيد. أبل طورت كل حاجة تقريبًا: تصميم جديد، معالج أقوى مع تبريد أحسن، وكاميرات احترافية بقدرات زووم تخض، وبطارية أكبر. لو أنت بتحب حجم الآيفون البرو العادي، فالسنة دي التطوير يستاهل فعلًا وهتاخد جهاز متكامل من كل النواحي.
السعر
الأسعار دي هي الأسعار العالمية المتوقعة وممكن تختلف في السوق المصري:
- في الخارج:
- نسخة 256 جيجا بسعر 1100 دولار.
- نسخة 512 جيجا بسعر 1300 دولار.
- نسخة 1 تيرا بسعر 1500 دولار.
- في السعودية :
- نسخة 256 جيجا بسعر حوالي 5200 ريال.
- نسخة 512 جيجا بسعر حوالي 6200 ريال.
- نسخة 1 تيرا بسعر حوالي 7200 ريال.
- في الإمارات :
- نسخة 256 جيجا بسعر حوالي 4700 درهم.
- نسخة 512 جيجا بسعر حوالي 5550 درهم.
- نسخة 1 تيرا بسعر حوالي 6400 درهم.
