شركة أبل أعلنت عن موبايلها الجديد المنتظر، الـ iPhone 17، واللي بيعتبر نقلة نوعية حقيقية عن الأجيال اللي فاتت، خصوصًا للنسخة العادية. أهم تغيير هو الشاشة اللي أخيرًا بقت بتدعم تردد 120 هيرتز (ProMotion)، مع سطوع أعلى وحماية أقوى. ده غير المعالج الجديد A19 اللي بيقدم أداء جبار، وكاميرا سيلفي جديدة تمامًا 18 ميجا بكسل، وعدسة تصوير واسع 48 ميجا بكسل، مع بطارية أكبر. يلا بينا نشوف كل تفاصيل الموبايل الجديد ومميزاته وعيوبه.
الشاشة (أهم وأكبر تطوير)
شاشة iPhone 17 دي أهم وأقوى نقطة في الموبايل الجديد، ولأول مرة في الآيفون العادي. الشاشة بتيجي بشكل النوتش في النص، ونوعها LTPO Super Retina XDR OLED بحجم 6.3 بوصة ودقة عالية جدًا. أهم حاجة فيها إنها بتدعم معدل تحديث متغير من 1 لحد 120 هيرتز (ProMotion)، وده بيخلي الحركة عليها سلسة وناعمة جدًا. سطوع الشاشة خرافي وبيوصل لـ 3000 شمعة، يعني هتشوفها بوضوح تام تحت أقوى شمس، وعليها طبقة حماية جديدة أقوى من نوع Ceramic Shield 2.
الكاميرات (نقلة جديدة)
أبل اهتمت جدًا بتطوير الكاميرات السنة دي فى iPhone 17
- الكاميرا الخلفية: مزدوجة، لكن بتطويرات كبيرة.
- الأساسية: بدقة 48 ميجا بكسل بفتحة عدسة F/1.6، وبتدعم المثبت البصري (OIS).
- الزاوية الواسعة (Ultra Wide): خدت تحديث ضخم وبقت بدقة 48 ميجا بكسل بفتحة عدسة F/2.2.
- الكاميرا الأمامية (السيلفي): اتغيرت تمامًا وبقت بدقة 18 ميجا بكسل بفتحة عدسة F/1.9، ومستشعر مربع عشان تاخد صور سيلفي أوسع وأفضل.
- تصوير الفيديو: كالعادة ممتاز، وبيدعم جودة 4K بمعدل 60 إطار في الثانية، والموبايل فيه 4 ميكروفونات عشان ميزة Audio Mix اللي بتخليك تتحكم في الصوت بشكل احترافي وانت بتصور.
- أزرار جديدة: فيه زرار Action Button اللي تقدر تخصصه، وزرار جديد اسمه Camera Control عشان تتحكم في الكاميرا كأنك ماسك كاميرا احترافية.
المعالج والأداء
الموبايل iPhone 17 بيشتغل بأحدث وأقوى معالج من أبل وهو A19 بتكنولوجيا 3 نانو، مع معالج رسومي خماسي النواة. المعالج ده هيضمنلك أداء صاروخي في كل حاجة، من أول المهام اليومية العادية لحد أتقل الألعاب والتطبيقات، ومش هتحس بأي تهنيج أو بطء نهائيًا. الموبايل بييجي بنسختين، 256 جيجا أو 512 جيجا، والاتنين معاهم 8 جيجا رام.
البطارية والشحن
البطارية كبرت شوية وبقت بسعة 3692 مللي أمبير، وبتدعم:
- شحن سريع سلكي بقوة 40 وات.
- شحن لاسلكي MagSafe و Qi2 بقوة 25 وات.
- شحن عكسي بقوة 4.5 وات.
باقي المواصفات
- التصميم والخامات: نفس التصميم الفخم المعتاد من أبل، ضهر من الإزاز مع فريم من الألومنيوم، والموبايل مقاوم للمياه والغبار بأعلى معيار IP68 لحد عمق 6 متر لمدة نص ساعة.
- الصوت: السماعات الخارجية صوتها ستيريو وممتاز كعادة أبل.
- الأمان: بصمة الوجه الـ Face ID.
- نظام التشغيل: بييجي بأحدث نظام تشغيل iOS 26.
- الألوان: متوفر باللون السماوي، الأبيض، البينك، الأخضر، والأسود.
المميزات
- iPhone 17 هو أول آيفون عادي بشاشة 120 هيرتز ProMotion ، وده بيخلي التجربة أحسن بكتير.
- شاشة سطوعها خرافي وحمايتها قوية جدًا وعليها طبقة مقاومة للانعكاسات.
- معالج A19 الجبار اللي هيضمنلك أداء ممتاز لسنين قدام.
- الكاميرات بتقدم أداء قوي جدًا، خصوصًا مع تطوير كاميرا الزاوية الواسعة والسيلفي.
- سماعات ستيريو صوتها عالي ونقي.
- إضافة أزرار التحكم الجديدة بتسهل الاستخدام .
العيوب
- كالعادة، هتحتاج تشتري الشاحن لوحده.
- مفيهوش كاميرا تيلي فوتو للزووم البصري.
- منفذ الـ USB لسه بسرعة 2.0.
محتويات العلبة
- هاتف Apple iPhone 17.
- دبوس معدني للشريحة.
- كتيب التعليمات.
- سلك USB من نوع Type C.
مراجعة سريعة للموبايل
من الآخر، موبايل iPhone 17 السنة دي بيقدم أكبر نقلة حصلت في الآيفون العادي من سنين. أخيرًا أبل حطت فيه أهم ميزة كانت ناقصاه وهي شاشة الـ 120 هيرتز، وده لوحده سبب كافي جدًا للتطوير. مع الشاشة الخرافية دي، هتاخد أداء صاروخي من معالج A19، وكاميرات متطورة جدًا سواء الخلفية أو السيلفي، وبطارية أحسن. لو أنت معاك آيفون قديم وعايز تطور، فالمرة دي التطوير يستاهل فعلًا وهتحس بفرق ضخم في كل حاة بتعملها على الموبايل.
السعر
الأسعار دي هي الأسعار العالمية وممكن تختلف في السوق المصري:
- في الخارج:
- نسخة 256 جيجا بسعر 800 دولار.
- نسخة 512 جيجا بسعر 1000 دولار.
- في السعودية:
- نسخة 256 جيجا بسعر 3800 ريال.
- نسخة 512 جيجا بسعر 4800 ريال.
- في الإمارات :
- نسخة 256 جيجا بسعر 3400 درهم.
- نسخة 512 جيجا بسعر 4250 درهم.
