شركة أوبو أعلنت عن موبايلها الجديد الـ Oppo A5x 4G وده موبايل داخل ينافس في الفئة الاقتصادية. كالعادة التصميم بتاعه من البلاستيك، لكن المرة دي الموبايل “حمار شغل” بمعنى الكلمة، لأنه مقاوم للصدمات ورذاذ المياه بشهادة IP65. شاشته كبيرة وسطوعها كويس بتردد 90Hz بس دقتها للأسف HD+. بييجي بمعالج اقتصادي هو الـ Snapdragon 6s 4G Gen1، مع كاميرات على قدها، لكن أهم حاجة فيه هي البطارية العملاقة 6000 مللي أمبير اللي بتدعم الشحن السريع بقوة 45 واط. يلا بينا نشوف كل مواصفاته ومميزاته وعيوبه.
البطارية والشحن فى Oppo A5x 4G
دي أقوى حاجة في الموبايل ده بلا منازع. بييجي ببطارية ضخمة جدًا بسعة 6000 مللي أمبير، يعني هتكمل معاك يومين شغل مستريح من غير ما تحتاج تشحنها. والأحلى من كده إنها بتدعم الشحن السريع بقوة 45 وات، فتقدر تشحن البطارية العملاقة دي في وقت قليل.
التصميم والمتانة فى Oppo A5x 4G
رغم إن الموبايل مصنوع من البلاستيك، لكن أوبو اهتمت جدًا بمتانته. الموبايل مقاوم للصدمات والكسر بشهادة عسكرية (MIL-STD-810H)، وكمان مقاوم للغبار والمياه بشهادة IP65. يعني لو وقع منك وقعات خفيفة أو جت عليه طرطشة مية، قلبه جامد ويستحمل معاك البهدلة.
الشاشة فى Oppo A5x 4G
شاشة الموبايل بتيجي بثقب للكاميرا السيلفي، وهي من نوع IPS LCD بمساحة 6.67 بوصة. الشاشة بتدعم معدل تحديث 90Hz وده بيدي سلاسة في الحركة، وسطوعها بيوصل لـ 1000 شمعة وده رقم ممتاز وهيخليك تشوفها كويس تحت الشمس. لكن العيب الأساسي في الشاشة إن دقتها منخفضة HD+ بس.
المعالج والأداء
الموبايل بيشتغل بمعالج من شركة كوالكم وهو Snapdragon 6s 4G Gen1 بتكنولوجيا 11 نانو. الأداء بتاعه اقتصادي، يعني هيمشيلك حالك في الاستخدام اليومي العادي زي المكالمات والسوشيال ميديا والفيديوهات، لكن طبعًا مش بتاع ألعاب تقيلة خالص. الموبايل بييجي بنسخة واحدة 128 جيجا مع 4 جيجا رام.
الكاميرات
الكاميرات هنا أداءها اقتصادي ومتواضع جدًا، وتقدر تقول إنها بتقضي الغرض وبس.
- الكاميرا الخلفية: بدقة 32 ميجا بكسل بفتحة عدسة F/1.8.
- الكاميرا الأمامية (السيلفي): بدقة 5 ميجا بكسل بفتحة عدسة F/2.2.
- تصوير الفيديو: آخره يصور فيديوهات بجودة FHD بدقة 1080 بكسل.
باقي المواصفات
- الذاكرة: بييجي بذاكرة 128 جيجا مع 4 جيجا رام، والخبر الحلو إنه بيدعم تركيب كارت ميموري في مكان منفصل جنب الشريحتين.
- الاتصال: بيدعم واي فاي Dual-band وبلوتوث 5.0.
- الصوت: فيه مدخل 3.5 ملم للسماعات، لكن للأسف مفيهوش ميكروفون إضافي لعزل الدوشة.
- الأمان: مستشعر البصمة مدمج في زرار الباور الجانبي، وبيدعم فتح الموبايل بالوش.
- نظام التشغيل: بييجي بأندرويد 15 مع واجهة أوبو ColorOS 15.
- الألوان: متوفر باللون الأزرق الغامق والأبيض.
المميزات
- بطارية عملاقة 6000 مللي أمبير هتنسيك الشاحن، ومعاها شحن سريع 45 وات.
- الموبايل بيستحمل الصدمات ورذاذ المياه، ودي ميزة نادرة في الفئة دي.
- شاشته سطوعها ممتاز تحت الشمس.
- بيدعم تركيب شريحتين وكارت ميموري في نفس الوقت.
- العلبة بتاعته فيها كل حاجة (شاحن وجراب واسكرينة).
العيوب
- الشاشة دقتها منخفضة HD+، وده عيب كبير في 2025.
- الكاميرات أداءها متواضع جدًا سواء الخلفية أو السيلفي.
- المعالج أداءه اقتصادي بحت، مش مناسب لأي ضغط أو ألعاب.
- مفيهوش ميكروفون إضافي لعزل الضوضاء، فصوتك في المكالمات ممكن ميكونش أنقى حاجة.
محتويات العلبة
- هاتف Oppo A5x 4G وعليه اسكرينة.
- راس الشاحن بقوة 45 واط.
- سلك USB من نوع Type C.
- جراب لحماية الضهر.
- دبوس معدني.
- كتيب التعليمات.
مراجعة سريعة للموبايل
بص من الآخر، موبايل Oppo A5x 4G مش بتاع تصوير ولا بتاع ألعاب تقيلة. ده موبايل معمول لناس محددة جدًا، الناس اللي عايزة بطارية تعيش معاهم يومين وتلاتة، وجسم موبايل يستحمل الشغل والبهدلة والمعاناة . لو انت استخدامك مكالمات، واتساب، فيسبوك، وشوية فيديوهات، ومحتاج موبايل بطاريته متخذلكش أبدًا وجسمه جامد، فده اختيار ممتاز ليك بالسعر ده، خصوصًا إن علبته فيها كل حاجة ومش هتحتاج تشتريله أي اكسسوارات.
السعر
- في مصر: للنسخة 128 جيجا مع 4 جيجا رام بسعر حوالي 7400 جنيه (ضمان محلي).
