شركة ريلمي أعلنت عن موبايلها الاقتصادي الجديد، الـ Realme C71، واللي بيركز بشكل أساسي على تقديم بطارية قوية جدًا بسعة 6000 مللي أمبير مع شحن سريع 45 واط، ودي حاجة نادرة في الفئة دي. في المقابل، الموبايل بيقدم مواصفات اقتصادية في باقي الحاجات، زي معالج Unisoc T7250 وشاشة بدقة HD+ وكاميرا خلفية 50 ميجا بكسل. يلا بينا نشوف كل تفاصيل الموبايل ومميزاته وعيوبه وهل يستاهل تشتريه ولا لأ.
البطارية والشحن (أقوى ميزة)
دي أهم وأقوى نقطة في الموبايل ده. بييجي ببطارية عملاقة بسعة 6000 مللي أمبير، يعني هتنسى الشاحن بتاعك وهتكمل معاك يومين شغل كاملين مستريح. والأحلى من كده إنها بتدعم الشحن السريع بقوة 45 وات، فتقدر تشحن البطارية الضخمة دي في وقت قليل جدًا، وكمان بتدعم الشحن العكسي بقوة 6 وات عشان لو حبيت تشحن بيه سماعة أو موبايل تاني.
الشاشة فى Realme C71
شاشة الموبايل Realme C71 ليها مميزات وعيوب. المميزات إنها كبيرة 6.67 بوصة، وسريعة جدًا بمعدل تحديث 120 هيرتز، وده بيخلي الحركة والتصفح عليها سلس جدًا. لكن العيوب إن دقتها منخفضة HD+ بس، وحواف الشاشة لسه كبيرة شوية، وسطوعها تحت الشمس يعتبر متواضع.
المعالج والأداء فى Realme C71
الموبايل بيشتغل بمعالج اقتصادي من نوع Unisoc T7250 بتكنولوجيا 12 نانو. الأداء بتاعه مناسب للمهام اليومية الخفيفة زي المكالمات والسوشيال ميديا والواتساب والفيديوهات. لكن طبعًا المعالج ده مش مخصص للألعاب التقيلة خالص. الموبايل بيتوفر بنسختين، واحدة 4 جيجا رام والتانية 6 جيجا رام، والاتنين بذاكرة 128 جيجا.
الكاميرات فى Realme C71
الكاميرات هنا أداءها اقتصادي ومتواضع، وبتقضي الغرض في الإضاءة الكويسة:
- الكاميرا الخلفية: أساسية بدقة 50 ميجا بكسل بفتحة عدسة F/1.8، وبتعتبر مقبولة في الفئة السعرية دي.
- الكاميرا الأمامية (السيلفي): بدقة 5 ميجا بكسل بفتحة عدسة F/2.2.
- تصوير الفيديو: آخره يصور فيديوهات بجودة FHD بدقة 1080p.
باقي المواصفات
- التصميم والخامات: الموبايل كله مصنوع من البلاستيك، لكن تصميمه شيك ومقاوم للصدمات الخفيفة ورذاذ المياه. وفيه لمسة حلوة وهي لمبة إشعارات RGB في الضهر.
- الذاكرة: بيدعم تركيب كارت ميموري في مكان منفصل جنب الشريحتين، ودي ميزة ممتازة.
- الصوت: للأسف السماعات الخارجية صوتها مونو مش ستيريو، لكن الخبر الكويس إن الموبايل فيه منفذ سماعات 3.5 ملم.
- الأمان: البصمة موجودة على زرار الباور الجانبي، وبيدعم الفتح عن طريق الوجه.
- نظام التشغيل: بييجي بأندرويد 15 مع واجهة ريلمي Realme UI 6.0.
- الألوان: متوفر باللون الأبيض والأخضر الغامق.
المميزات
- بطارية جبارة 6000 مللي أمبير هتدوم معاك وقت طويل جدًا.
- شحن سريع 45 وات والشاحن موجود في العلبة.
- تصميم شكله حلو وخفيف وفيه لمبة إشعارات RGB.
- الكاميرا الخلفية الـ 50 ميجا بكسل بتقدم أداء مقبول على السعر ده.
- بيدعم تركيب شريحتين وكارت ميموري في نفس الوقت.
- شاشة سريعة 120 هيرتز.
العيوب
- دقة الشاشة منخفضة (HD+) وحوافها كبيرة نسبيا .
- المعالج أداءه اقتصادي بحت، ومش مناسب لأي ضغط أو ألعاب تقيلة.
- السماعات الخارجية صوتها مونو.
- مش بيدعم خاصية الـ NFC.
- سطوع الشاشة تحت الشمس مش أفضل حاجة.
محتويات العلبة
- هاتف Realme C71 وعليه اسكرينة لحماية الهاتف .
- راس الشاحن بقوة 45 وات.
- سلك USB من نوع Type C.
- جراب لحماية الضهر.
- دبوس معدني.
- كتيب التعليمات.
مراجعة سريعة للموبايل
من الآخر، موبايل Realme C71 هو موبايل واضح وصريح جدًا. هو مش بتاع ألعاب ولا بتاع تصوير احترافي ولا بتاع شاشة خرافية ولا أى حاجة. الموبايل ده معمول لشخص واحد بس: الشخص اللي عايز بطارية تعيش معاه لأطول فترة ممكنة وبسعر اقتصادي للغاية . لو أنت كل اللي يهمك في الموبايل إن بطاريته متفصلش منك أبدًا، وبتستخدمه في الحاجات الأساسية زي المكالمات والواتساب والفيسبوك، فالموبايل ده هيكون اختيار مثالي ليك، خصوصًا إن معاه شاحن سريع في العلبة وهيقدملك قيمة ممتازة وكويسة مقابل الفلوس في نقطة البطارية دي.
السعر
- في مصر (ضمان محلي):
- نسخة 128 جيجا مع 4 جيجا رام بسعر حوالي 6,600 جنيه.
- نسخة 128 جيجا مع 6 جيجا رام بسعر حوالي 7,000 جنيه.
